Pamilya gipamusil sa ex-PAF nahadlok

Nangayo   karon og seguridad sa kapolisan sa dakbayan sa Sugbu ang pamilyang Pontanar kinsa namatyan og duha ka sakop sa pamilya human gipusil sa ilang umagad nga retiradong Philippine Air Force niadtong Biyernes sa gabii   sa dalan Dagohoy, barangay Apas ning dakbayan.

Kahinumduman nga niadtong milabay'ng Biyernes sa gabii dead-on arrival sa Perpetual Succour  Hospital ang amahan nga si Cristito Pontanar, 72,  ug anak niini nga    ug Esmeraldo Pontanar, 41, samtang naangol  sila si Maria Glen Pontanar,  40,  asawa ni Esmeraldo ug 13 anyos nga anak nga si Paul human gipamusil ni retired Master Sgt. Nestor Bugarin.

Gikatahong paghot lang sa iro maoy naghatod sa pabilo sa pagpamusil apan karong bag-o migawas usab ang   motibo sa  pamusil nga matud pa wala magkauyon sa bahin sa ilang   yuta.

Gibutyag kagahapong adlawa ni Cebu City Police Office  director Sr. Supt Patrocinio Comendador sa mga sakop sa media nga  si Kapitan Ramil  Ayuman mi-request  sa kapolisan kagahapon sa buntag human usab nangayo’g tabang ang pamilya.

Sumala pa ni Comendador nga iya nang gimanduan ang Mabolo Police Station nga maoy mohatag sa seguridad sa mga kabanay ug  magdepende na lang unya kini sa paagi sa seguridad nga mahatag  sa kapolisan.

Subay niini, iyang giklaro nga gimanduan na niya ang Homicide Section nga makig-alayon sa Central Command aron makatabang  usab   pagresolbar sa maong kaso.