Minor giyatak-yatakan sa igsuon sa naibgan

Nakalingkawas sa tinong kamatayon ang usa ka minor de edad human giyatak-yatakan, gikulata ug gidunggab sa maguwang sa iyang gikaibgan nga laing minor de edad niadtong Sabado sa alas 11 sa gabii diha sa Lower Kauswagan, Kinasang-an, Pardo ning dakbayan.

Si SPO1 Romeo Solon, desk officer sa Pardo Police Station nga gikahinabi sa Banat News miila sa biktima nga si Danilo Recabo, 17, nga nagpuyo sa nahisgutang lugar, samtang ang mikulata ingon man mi,dunggab kaniya mao ra usab ang iyang silingan nga si Michael Pagatpat ,18, maguwang sa iyang gikaibgan menor de  edad nga babaye.

Ang biktima nga si Recabo nakaangkon og samad dinunggaban sa iyang tuong bahin sa buko-buko agi sa usa ka “ice pick” ingon man hubag sa nawong ug maayong pagkagisi sa ubos nga bahin sa wait niini sa dihang gitabangan og kulata sa suspetsadong si Michael ug laing usa ka wala mailhing ginganlan og John.

Sumala pa ni SPO1 Solon nga ang biktima mitug-an nga mga alas 11 sa gabii niadtong Sabado nag-estoryahanay sila sa manghod sa suspetsado dili layo sa panimalay niini.

Dihang kalit lang gibadlong ni Michael ang iyang igsoung babaye sa pagpauli apan sa kalit lang gisukmag ang iyang nawong samtang ang laing kauban niining si John nitabang usab sa pagkulata pinaagi sa pagyatak-yatak ug sukmag kaniya.

Dugang pa nga gihugway sa biktima nga nasuya ang suspetsado ingon man ang wala mailhing kauban niini nga maoy nag-apura sa suspetsado nga pabirahan siya.