4 gipusil tungod sa iro

Paghot sa iro maoy nahimong pabilo sa panag-away nga misangpot sa pagpamusil nga gikamatay sa manag-amahan ug duha ang naangol diha sa dalan Dagohoy sa barangay Apas ning dakbayan niadtong milabay'ng gabii. Ang nangamatay mao ang manag-amahang sila si Cristito Pontanar, 72, ug anak niining si Esmeraldo Pontanar, 41, negosyante og fashion accessories samtang ang nangaangol mao sila si Maria Glen Pontanar, 40, asawa ni Esmeraldo ug ang ilang anak nga si Paulo, 13.

Samtang ang gitumbok nga suspek mao ang bana ra usab sa igsuon ni Esmeraldo nga usa ka retiradong sakop sa Philippine Air Force nga si Nestor Bugarin, 48, kansang asawa mao si Anecita.

Sa imbestigasyon ni SPO2 Rey Cuyos sa Homicide Section nagsugod ang panag-away dihang si Maria Glen mipahimangno sa asawa sa suspek nga si Anecita tungod sa banha kaayong paghot sa mga iro niini.

Apan ang maong komprontase gikatahong nisangpot sa mainitong panagbinayloay og mga pulong tali sa duha ka babaye hangtud nga miabot si Esmeraldo ug mipatunga sa duha.

Diha-diha gikatahong mikalit og gawas ang suspek gikan sa ilang balay nga armado na og .45 kalibreng pistola ug walay daghang pangutana gipamusil ang managtiayon.

Samtang hasta ang anak sa managtiayon nga si Paulo giapil pagpusil ug naigo diha sa tiyan samtang ang inahan niini nga si Maria Glen naigo usab diha sa tuong bitiis.

Ang 72-anyos nga ugangan sa suspek ug amahan ni Esmeraldo nga si Cristito nga nakadungog sa kagubot diha sa gawas daling misusi aron unta pakgangon   ang panag-away   iyang mga anak apan hasta kini gipusil sa suspek ug naigo diha sa tiyan ug sa tuong bitiis.

Si Esmeraldo naigo usab diha sa likod, walang abaga, walang bahin sa lawas. Si Esmeraldo ug Cristito parehong dead on arrival sa Perpetual Succour Hospital samtang gitabang usab ang manag-inahang sila si Maria Glen ug Paulo.

Lakip sa naigo sa bala mao ang sakyanang puti nga Mitsubishi nga awto nga may plakang GFX-798 nga gipanag-iya sa usa ka Eleonor Carloman diha sa kilid sa crime scene.

Usa ka magazine sa kalibre .45 pistola nga may usa ka buhing bala; usa ka magazine pouch; pito ka basiyo sa bala ug duha ka slugs ang narekober sa mga sakop sa Scene of the Crime Operation pinanguluhan ni Insp. Oliver Lariosa diha sa dapit.

Sa imbestigasyon sa kapolisan nasuta nga sulod sa duha na ka tuig nagkabangi na ang managsuong Pontanar tungod sa parkingan sa ilang sakyanan ug ning bag-uhay lang nagkabangi na usab sila gumikan sa pasangil sa usa nga mas gipaboran sa ilang ginikanan ang usa atol sa pagbahin-bahin sa mga yuta sa ilang mga ginikanan.

Ang suspek dali usab nga miikyas diha sa dapit ug kasamtangan pang gipangita sa kapolisan.

Sa laing bahin, usa ka Herbet Rada nga silingan sa mga Pontanar ang gidakop atol sa pagresponde nila ni Sr. Insp. Aileen Recla human kini mipabuto og pusil diha sa luyong bahin sa panimalay sa mga Pontanar.

Matud pang Recla nga hubog si Rada ug nasuko kini dihang giabog sa mga mirespondeng polis pagawas sa crime scene maong niuli kini ug nikuha og .38 kalibreng rebolber ug nagpabuto.

Nasuta nga higala ni Rada si Cristito sanglit dugay na silang managsilingan ug gikasuko niini ang pag-abog kaniya sa mga polis.