Computer sets gihatag ngadto sa Talisay police

Si Kongresista Eduardo Gullas miawhag kagahapon sa hepe sa kapolisan sa dakbayan sa Talisay Supt. Romeo Perigo nga atimanon ang kahapsay ug kalinaw sa dakbayan.

Human mahibaw-i sa kongresista ang kabahin sa ka kuwang sa pasilidad sa kapolisan sa siyudad personal niining gihatod ang tulo ka unit sa computers lakip na niini ang mga printers.

Duha sa maong mga computer ang gihatag ni Gullas ngadto sa kapolisan ug ang usa ka unit ang gihatag niini ngadto sa fire station.

Si Gullas ang nagkanayon ngadto kang Perigo nga hatagan kini niya og suporta kabahin sa mga panginahanglanon niini sa pasilidad apan kinahanglan nga tutokan usab sa hepe ang pagpatunhay sa kahapsay ug kalinaw sa dakbayan.

Kahinumduman nga niadtong milabay’ng tuig atol pagpahigayon og oath taking sa mga opisyal sa mga kabarangayan sa Talisay si Gullas ang mihagit kang Perigo nga atimanon ang pagsumpo sa mga ilegal nga kalihukan sa dakbayan sama sa ilegal nga drugas ug sugal.

Kahinumduman usab nga sa milabay’ng adlaw ang hepe sa kapolisan ang mibutyag nga kuwang sila og mga computer, handset radio ug mga sakyanan aron dili malangan ang tanan nilang mga buhaton ug mapadali usab ang ilang pagtubag sa emerhensiya.

Matud ni Gullas nga ang maong problema sa polis ang nabasahan na lang niya sa pamantalaan.

Gawas sa maong mga computer unit ang kongresista nagkanayon nga mangita og paagi nga mahatagan pa og sakyanan ug mga radyo ang kapolisan ug sa uban pang mga panginahanglanon.

Gawas sa kapolisan gitut`okan usab ni Gullas ang kabomberohan sa ilang mga panginahanglanon.

Ang Talisay City Fire Marshal, Felipe Canillas mibutyag ngadto sa kongresista nga aduna lang silay tulo ka truck ug usa ka ladder truck diin usa sa maong truck ang naguba karon.

Si Canillas ang mihangyo kang Gullas nga hatagan sila og water tanker.

Kagahapon si Talisay City Administrator Ritchel Bacaltos ug Konsehal Arturo Bas, tsirman sa kahapsay ug kalinaw   mikuyog sa kongresista diha sa paghatag sa mga computer units.