Usa ka patay’ng lawas sa wala hiilhing lalaki nga may pinusilan sa buko-buko ug nawong ang napalgang nagbuy-od sa kasagbutan kagahapon sa buntag sa sitio Lamac, barangay Tayud sa lungsod sa Liloan.
Si SPO1 Claudio Castro Jr. nga nahinabi sa Banat News miingon nga napalgan sa mga lumolupyo sa maong dapit ang maong patay’ng lawas alas 9 pasado ang takna sa miaging gabii.
Gibana-banang 5’7 ang height niini ug gibana-banang 30 ngadto sa 35 ang panuigon.
Nagsul-ob kini og puti nga t-shirt, maong nga short pants, nagtsinelas, dunay wedding ring sa tudlo.
Dugang pa ni SPO1 Castro nga gidul-itan sa pagpusil sa kalibre .45 ang maong biktima base usab sa ilang nakita nga gunpowder burns nga mitapot sa lawas niini.
Duol sa nagbuy-od nga patay’ng lawas nakaplagan ang duha ka mga kabhang sa bala sa kalibre .45 nga ilang gituohan nga maoy gigamit sa pagpatay sa maong tawo sa wala pa hiilhing mamumuno.
Ang maong patay’ng lawas ang gipahimutang sa Maturan Funeral Homes sa Poblacion sa maong lungsod.