Nagtingkagol ang usa ka sakop sa Alima-ong warrior human kini masikop sa kapolisan sa dakbayan sa Talisay nga nagdala og pusil kagahapon sa kadlawon diha sa sitio Kasambagan, barangay Tabunok, dakbayan sa Talisay.
Si PO3 Arnold Damasco ug PO1 Andy Galorio ang miila sa suspetsado nga si Pablo Habonita Cabigas, 29, residente sa sitio Bahadas sa nahisgutang barangay.
Si Cabigas ang naaktohan sa nahisgutang mga polis nga nagbit-bit og usa ka kalibre .357 nga revolver ug upat ka buhing bala.
Si Damasco sa pakighinabi niini sa Banat News kagahapon nagkanayon nga si Cabigas ang dunay gipakita ngadto kanila nga Memorandum Receipt (MR) ug Mission Order apan dili kini gikan sa Camp Crame hinungdan nga ilang gipasakaan kagahapon og kasong illegal possession of firearms ang suspetsado diha sa Talisay City prosecutor.
Matud niini nga si Cabigas nangangkong usa ka sakop sa Alima-ong usa ka indigenous group diin ang buhatan niini nahimutang sa Nivel Hills, barangay Lahug niining dakbayan ug mikabat sa 5,000 ang ilang mga miyembro nga mga taga Talisay.
Si Damasco midungag nga si Cabigas mibutyag ngadto kanila nga gikan kining naghusay sa ilang mga silingan nga nag-away.
Si Cabigas ang nagtingkagol karon sa Talisay detention cell samtang ang mga polis ang mipahigayon og imbestigasyon kabahin sa mga dokumentong gipakita sa suspetsado ngadto kanila.
Sa laing bahin, si SPO3 Joel Wenceslao, jailer sa detention cell sa pakighinabi niini sa Banat News kagahapon sa hapon nagkanayon nga si Cabigas ang mibutyag ngadto kaniya nga ang ngalan sa ilang grupo nga “Alima-ong” ngalan kini sa langgam ug pito ka buwan pa lang siya nga miyembro niini.
Gibutyag usab ni Cabigas ngadto kang Wenceslao nga si Fernando Alegado maoy ilang lider sa Tabunok chapter ug naa kini magpuyo sa barangay Bahadas.