Kapolisan sa Talisay kuwang sa mga ekipo
Hepe sa kapolisan sa dakbayan sa Talisay Superintendent Romeo Perigo mibutyag nga kuwang sila sa mga ekipo aron mapadali ang pagpahigayon sa ilang mga trabaho.
Gikan sa computer hangtod sa sakyanan nga gamiton sa mga polis sa pagtubag sa emerhensiya kuwang sila niini.
Sa pakighinabi niini kagahapon sa Banat News gibutyag sa hepe nga
Ang Talisay City police station dunay upat ka computer units nga gigamit sa mga polis sa pagbuhat og mga affidavit sa mga mopasaka og reklamo ug uban pang mga transaksiyon apan nagkinahanglan pa gyud sila og laing mga computer units aron dili malangan ang uban pang mga paper works.
Apan niining bag-o lang ang maong problema ang nasuta ni Bokal Julian Daan dihang mibisita kini diha sa police station.
Matud sa hepe nga si Daan ang misaad nga mohatag ngadto kanila og dugang tulo ka mga unit sa computer ug bisan wala pa maabot ang maong mga computer gihangop kaayo nila kini.
Gikan sa ka kuwang sa mga computer ang kapolisan nagkinahanglan usab og dugang mga radio units alang sa ilang komunikasyon aron kung adunay mga alarma ug nagkinahanglan og back-up dali lang katawag sa ilang mga kauban ang mga polis nga nadestino sa field.
Ang kapolisan nga nadestino sa field ang gigamit nila sa ilang komunikasyon ang ilang kaugalingong cellular phone apan limitado kini tungod sa kakuwang og load diin kaugalingon nilang kwarta ang gipalit nila og load.
Ang hepe nagkanayon nga nagkinahanglan sila og 15 ka handset.
Unom ka radio units ang giuli na sa kapolisan ngadto sa General Services Office (GSO) tungod kay nangaguba na kini ug karon matud ni Perigo nga nanghuwam lang siya og lima ka unit sa radio gikan sa provincial headquarter nga maoy ilang temporaryong gigamit.
- Latest
- Trending
