Usa ka lawas sa lalaki ang nakaplagan nga naglutaw-lutaw sa Mananga River pasado alas 10:00 kagabii. Ang biktima naila nga si Mario Taborada, 38, lumulupyo sa Psalm Beach, Poblacion, Talisay City.
Base sa imbestigasyon nila ni PO3 Leandro Azarcon ug PO2 Jundave David nakaangkon og mga samad pinusilan ug dinunggaban si Taborada lakip na sa iyang ulo.
Pulong pa ni PO2 David gibana-banang napulo ka mga bala ang miigo sa lawas ni Taborada.
Atol sa imbestigasyon sa kapulisan sa Talisay, nagkanayon ang live-in partner ni Taborada nga si Virginia nga namista sila sa sitio Sagingan, sa Lawaan III, dakbayan sa Talisay niadtong higayona apan pila lang ka oras ang milabay napalgan na nga patay si Taborada.
Matud sa usa sa mga silingan ni Taborada nga nagpaila lang sa ngalan nga Eddie, human pusila, gidunggab pa gyud si Taborada sa mamumuno hinungdan sa iyang daling kamatayon.
Ang igsuon ni Taborada nga si Clara Tabira sa pakighinabi sa Banat News nagkanayon nga tulo ka mga tawo ang ilang gitumbok nga mipatay sa iyang maguwang.
Pulong pa ni Tabira, adunay mga nakakita sa maong hitabo ug gitudlo nila si Janjan Ladira ug duha ka mga bayaw niini nga maoy mipusil ug midunggab-patay sa iyang igsuon.
Dugang ni Tabira nga niadtong Oktubre tuig 2006 pa nagsugod ang panagbikil sa iyang maguwang ug ni Ladira nga mao’y ilang nakit-an nga rason sa maong insidente. Gani, napusilan sa mata si Taborada niadtong tuiga.
“Basta makainom na siya (Mario) mobahad na siya nga manimalos siya, giunhan na lang siya,” pulong pa sa usa sa mga silingan ni Taborada.