Gipadaplin sa Ombudsman Visayas ang mga imbestigasyon sa mga kaso nga gisang-at sa matag habig nila ni Mayor Jonas Cortes ug Dr. Paulus Marae Cañete nunot usab sa lakang nga ilang gihimo nga pagsabot-sabot niini.
Ang lakang nga pagsabot-sabot sa matag habig nila ni Cañete ug Cortes sa Ombudsman Visayas ang gitumong alang sa paspas nga pagsulbad sa panagsungi sa duha sa dili pa mobukas ang klase karong bulan sa Hunyo niining tuiga sanglit maoy ma-apektohan ang pagtungha sa mga tinun-an.
Si Dr. Cañete nga misanong sa pagtawag sa buhatan sa Ombudsman Visayas ang nakigtagbo kang Ombudsman Visayas Director Virginia Palanca-Santiago niadtong Martes.
Ug gisunod usab sa pagpatawag ni Santiago si Mayor Cortes niadtong Huwebes kinsa miluwat og mga kondisyon nga pagahimoon ni Cañete alang sa pag-abli sa dalan sa sabot-sabot nga gisugyot sa Ombudsman Visayas.
Naglakip sa mga kondisyon mao ang paghatag og account ni Cañete sa salapi sa Mandaue City College sukad sa iyang pagdumala sa maong tulunghaan hangtod nga nahitabo ang pagtangtang kaniya sa katungdanan.
Dugang nga mga kondisyon mao ang paglimpiyo sa iyang pangalan ug magpakalig-on sa pag-sagubang sa mga kakulian nga maoy bugti sa mga gipakita niyang lihok nga pagdumili pagsanong sa pagbiya sa katungdanan isip presidente sa MCC.
Si Elmer Repalda nga tigpamaba ni Cañete miingon nga ang pag-account sa iyang pagpadayag miingon nga dili lisod alang kanila ang paghatag og kwentada sa MCC subay sa amended charter.
Dugang pa niya nga nakahimo na sila og kwentada sa 2006 hangtod sa 2007 ug ang Hunyo 2007 hangtod karong panahona mahimo nilang kasugdan sa higayon nga ikasumitir kanila sa kagamhanan ang record sa maong tulunghaan.