Gipahibalo sa direktor sa rehiyonal nga buhatan sa Land Transportation Franchising and Regulatory Board nga dili makapaningil og P6.50 ang mga drayber sa PUJ kun dili makakuha og notisya sa ilang buhatan.
Si LTFRB-7 regional director Romulo Bernardes nagkanayon nga gitagalan sa ilang buhatan kutob ugmang adlawa ang mga drayber sa pagkuha nga libre og kopya sa notisya sa usbaw sa plete.
Giklaro niya nga ang mga drayber ug operator nga dili makapapilit og notisya sa ilang buhatan, dili mahimong makapaningil sa P6.50 nga plete.
Sa susamang bahin, giawhag usab niya ang mga drayber ug pasahero sa pag-andam og 50 sentimos kun mobiyahe aron dili motumaw ang panaglalis.
Sumala pa niya nga sagad mahitabo ang lalis kun walay andam nga sensiyo ang drayber samtang moplete og tibuok ang mga pasahero.
Aron malikayan ang lalis, sumala pa ni Bernardes nga mas maayong mag-andam na lang sila og sensiyo.
Sa laing bahin, si Bernades miawhag sa mga drayber sa pagpadala og pormal nga hangyo sa iyang buhatan aron matabangan sila nga makapalit og baratong bugas gikan sa National Food Authority nunot niining nagmahal nga presyo sa bugas humay.
Si Bernardes nagkanayon nga mahimo siyang mopatunga aron makapalit og barato nga bugas ang mga drayber ngadto sa NFA-7.