Nangawat kay 'mingaw sa uyab

Usa ka babaye ang gikatahong nituyo og buhat og krimen aron   lang gyud makauban ang iyang hinigugmang bilanggo diha sa Talisay City Jail.

Ang gidakop tungod sa pagpangawat mao si Janice Villareal Alforque,22, taga sitio Seaside, Poblacion, dakbayan sa Naga human kini masakpi sulod sa usa ka mall sa barangay Tabunok dakbayan sa Talisay.

Si Alforque gidakop sa gwardiyang si Reygie Tacas human kini mogawas nga nagdala sa mga baligya nga wa moagi sa cashier counter.

Nakuha diha sa iyang posesyon ang usa ka mahalong blouse nga balor P649.75, usa ka mahalong t-shirt nga nagkantidad og P339.00, usa ka paper bag nga balor P42.50 ug uban pang mga bisti nga mokabat og di-momenus P1,260.

Dihang gipangayuan og pamahayag, si Alforque nagkanayon nga gawas nga naibog siya sa mga baligya apan walay ikabayad niini buot usab niyang makauban ang iyang uyab nga natanggong karon diha sa maong city jail tungod kay dugay pa kini kaayong makagawas.

Wala hinuon ibutyag kung unsay kaso sa iyang uyab nga maoy rason sa pagkabilanggo niini.