Gumikan sa kahidlaw sa iyang minahal usa ka detainee sa Lapulapu police station mipuga sa detention cell apan sud sa tulo ka oras nasikop kini og balik sa kapolisan sa dakbayan sa Lapulapu.
Ag mieskapo ug nadakpan pag-usab mao si Abraham Aba Senerpida, 25, residente sa barangay Mactan dakbayan sa Lapulapu nga nag-atubang og kasong kalapasan sa RA 9165 may labot sa illegal nga drugas.
Matod pa sa mga jailers nga sila si SPO4 Danny Tampus ug PO1 James Colina, ilang gisugo pagpalabay sa basura si Senerpida apan sa kalit lang milayat sa koral ug miikyas.
Ang mga igsuon sa suspek maoy giduol sa kapolisan aron patahanon kini og balik ngadto kang Sr. Insp. Condrado Manatad human masayri nga tua siya sa panimalay sa iyang ka live-in sa sitio Langub barangay Guadalupe dakbayan sa Sugbu.
Wala mopakita og pagsukol si Senerpida sa kapolisan sa dihang gisikop ug gidala og balik sa bilanggoan.
Matod pa ni Senerpida nga dugay na niyang giplano ang pag-eskapo tungod kay gimingaw siya sa iyang ka live-in nga ginganlan og “Negra.”
Samtang matod pa ni Sr. Insp. Florentino Clemente Jr. ang deputy chief for administration sa LLCPO duna gyuy atubangon nga kasong administratiba sila si Tampus ug Colina.