1 patay, 2 angol sa aksidente

Usa ka lalaki ang namatay ug duha usab ang grabeng naangol dihang nasungag ang ilang gisakyang motorsiklo sa gikasugat nga Toyota Hi Ace sa barangay Basak, dakbayan sa Lapulapu sa miaging tungang gabii.

Ang namatay wala pa mailhi sa kapolisan sanglit wala kini magdala og lisensiya nga nagmaneho sa motorsiklo apan ang duha ka backriders niini mao sila si Kezly Tuñacao, 17 ug Mary Cris  Olitref, 19,  pulos taga Sangi, Looc sa maong dakbayan.

 Si PO2 Jude Marifosque sa traffic section sa kapolisan sa maong dakbayan nga nahinabi sa Banat News miingon nga gikan sa merkado publiko sa barangay Poblacion ang mga biktima paingon sa Marigondon.

Apan paghidangat sa maong lugar kalit lang nga gikasungag ang Toyota Hi Ace nga gimaneho ni Jose Bens Andales, 37,  taga Camella Homes sa barangay Bankal sa maong dakbayan.

Si PO2 Marifosque miingon nga ang duha ka mga naangol wala usab nila masukitsukit sanglit grabe usab ang ilang kahimtang ug padayon pa nga giatiman sa mga doktor sa Vicente Sotto Memorial Medical Center sa dakbayan sa Sugbo.