Nalandig sa tambalanan ang hepe sa mga barangay tanod sa Camputhaw nga si Emmanuel Du human kulataha sa gituohang sabog sa ginadiling drugas niadtong Domingo sa hapon.
Si Du maoy unang mitubag sa alarma nga ilang nadawat sa dihang usa ka Ace Deligero ang giingong nanghasi sa sitio Laray sa nahisgutang barangay.
Ang suspek nga giingong nakainom usab sa ilimnong makahubog, gialarma sa ilang mga silingan dihang gilabay niini og bato ang iyang uyuan ug miangol usab sa lain nilang silingan.
Maayong pagkasamad sa agtang sa uyoan ni Deligero, samtang nagisi usab ang ilong ug nabun-og ang dughan sa silingan niini atol sa maong hitabo.
Ang hepe sa tanod sa Camputhaw nga maoy unang nakadawat sa alarma, dali nga mitubag ug gibadlong ang suspetsado sa gihimo niini.
Apan imbes mopatuo si Deligero, gikulata na hinuon sa suspetsado si Du ug miresulta sa pagkahubag sa ulo ug nawong niini.
Nasikop ra hinuon si Deligero ni Kapitan Lorenzo Basamot nga misunod pagtubag sa maong alarma ug nagtingkagol na sa Fuente Police Station.
Samtang si Du gipaubos ni Basamot sa Computed Tomography (CT-Scan) diha sa Cebu City Medical Center tungod kay kini giingong nagsige og suka niadtong miaging gabii.
Gitakda kagahapong adlawa ang pagpasaka og tukmang mga kaso batok kang Deligero nga naglakip sa resisting arrest, direct assault, physical injuries ug uban pa.