0% VAT sa petrolyo gikahinangop

Si Senador Mar Roxas mihulagway sa gisugyot nga zero value-added tax (VAT) sa petrolyo nga usa ka “win-win solution” ngadto sa yangungo sa transport sector ug mga kunsomedor tungod sa pagmahal sa mga produktong petrolyo.

“Kung gusto ng gobyerno ng ‘win-win’ na solusyon, suportahan na nito ang pagtanggal ng VAT sa langis. Agad na makikinabang dito ang parehong tsuper at pasahero, kaya hindi ko alam kung bakit ipinagdaramot pa rin ito,” matud pa ni Roxas sa pamahayag nga nadawat sa Banat News.
Si Roxas namahayag niini samtang iyang gisaway ang kagamhanan tungod sa makalibog nga polisiya sa pag-isyu og provisional fare hike, apan gibakwi pipila ka oras ang nakalabay.
“Hindi magandang urong-sulong ang pamahalaan sa panahon ng krisis. Umasa ang ating mga tsuper, kinabahan naman ang ating mga pasahero. Sa huli, hindi nakatulong ang gobyerno,” dugang pa niini.

Si Roxas nga chairman sa Senate Committee on Trade and Commerce nagkanayon nga husto ang desisyon sa kagamhanan pagtuon kun isuspenso, pakubsan o wad-on ang 12% VAT sa lana ug kuryente.

Nanawagan siya sa Kongreso sa pagtuki sa maong sugyot aron kasugdan dayon ang hustong lakang alang niini. Ang Senado nagsugod na pagtuki niini, apan dili maka-uswag hangtod ang Ubos Balay Balaoranan dili mosugod sa tax measures.