Namadlong gipusil

Usa ka drayber sa usa ka kompaniya ang nalandig sa tambalanan ning dakbayan human gipusil sa grupo sa wala mailhing mga lalaki  nga iyang gibadlong kagahapon sa kadlawon diha sa Duterte Street Banawa barangay Guadalupe.

Ang biktima giila sa kapolisan nga si Teddy Milan, 28, kinsa nagpuyo sa nahisgutang lugar ang nakaangkon ug samad pinusilan sa iyang walang bahin sa dughan nga nilapos sa walang braso.

Sa imbestigasyon nila ni SPO4 Alex Dacua sa homicide section sa Cebu City Police Office ang biktima nag-inom uban sa iyang higala gawas sa ilang balay.

Naabot ang wala mailhing suspetsado uban sa mga kauban niini ug gibadlong sa biktima gumikan kay nagsaba-saba apan nasuko ang suspetsado nilakaw ug pipila ka minuto nibalik nagdala na og armas ug mipusil ngadto sa biktima human dali usab kining miikyas.

Samtang sa pikas nga bahin way swerte ang usa ka lalaki nga ginganlan ug Cedoy Turno alias “Buddy” hingkod ang panuigon taga Ma. Cristina St. barangay Capitol.

Ang biktima gitabangan sa pagdunggab sa upat ka batan-ong rugby boys kagahapon usab sa kadlawon diha sa may Caltex Gas Sation nga nahimutang sa Mango Avenue.

Base sa imbestigasyon sa  kapolisan nga ang biktima nakaangkon og samad dinunggaban sa dughan, walang bahin sa tiyan, abaga ug uban pang parti sa lawas.

Usa ka taxi driver nga ginganlan og Ricardo Duterte ang ni-asoy sa kapolisan nga ang biktima migukod sa upat ka mga batan-ong rugby boys nga nanagan sa nahisgutang lugar.

Apan sa kalit lang nanghunong kini ug nagtinabangay sa pagdunggab ngadto sa biktima human daling nanibat palayo sa dapit ug wa na maabti pa sa mga niresponding polis samtang ang biktima gidala sa Cebu City Medical Center.