Gikompirma ni Talisay City Veterinarian Dr. Galileo Larawan nga natagak sa “AA” standard ang ihawan sa siyudad sa gipahigayong inspection sa National Meat Inspection Services (NMIS) niadtong Biyernes tungod kay usa sa ilang ekipo sa ihawan ang guba na.
Si Larawan sa pakighinabi niini sa Banat News kagahapon sa udto mibutyag nga ang “hoist” o bitayan sa ihawong mananap aron dili kini masangyad sa semento kung limpiyohan na kini ang naguba na ug niadtong buwan sa Pebrero niining tuiga pa siya mi-request sa General Services Office nga mopalit og puli sa maong ekipo apan hangtud karon walay naabot.
Sa maong hitabo ang mga mangingihaw anha na mopahigayon og limpiyo sa karne nga giihaw na sa kilid nga bahin sa ihawan ug ang karne ilurag lang kini sa semento diin gidili gyud unta kini.
Usa usab sa mga problema nga gibutyag ni Larawan mao nga ang mga personnel sa mga supplier ang mosulod sa ihawan diin gidili kini paglikay sa kontaminasyon.
Niadtong buwan sa Mayo tuig 2005 gisugdan ang operasyon sa ihawan ug matud ni Larawan nga “conditional” ang “AA” standard niini tungod kay kuwang pa ang ubang mga rekisitos niini.
Karong petsa 23 niining buwana ma-expire na ang accreditation sa ihawan sa NMIS apan matud usab sa city veterinarian nga mobalik ang pagka “AA” standard sa ihawan sa siyudad kung matuman na usab nila ang ubang mga reskisitos.
Si Larawan nagkanayon nga 60-70 porsyento nga gisuplayang karne sa Talisay ngadto sa dakbayan sa Sugbu.
Kada adlaw ang ihawan moihaw og 200 ka baboy ug 20-30 ka mga cattle ug kung weekends mokabat ngadto sa 300 ka baboy ang maihaw ug mokabat ngadto sa 40-50 ka cattle.
Matag buwan ang ihawan ang mokita og halos P1 milyon ug sa karon nga natagak na kini sa “AA” standard gilauman nga mokunhod ngadto sa sobra sa katunga ang abot niini, dugang pa ni Larawan.