Tulo ka mga tulisan milampos sa pagtulis sa usa ka taxi driver didto sa Barangay Cambaro, dakbayan sa Mandaue kagahapon sa kaadlawon.
Ang biktima mao si Aldwin Limbaga, 38, ulitawo nga maoy nagmaneho sa LTC taxi nga adunay plaka nga GVS 240.
Sa pasiunang imbestigasyon ni PO1 Alvin Itona sa kapolisan sa Station 5 nasayran nga gipara sa maong dapit si Limbaga sa tulo ka mga tawo ug sa dihang nakasulod na kini sa maong taxi kalit lang nga mition og kalibre .38 nga rebolber ngadto kaniya ang naglingkod sa atubangan dala ang pagdeklarar nga tulis.
Way nahimo si Limbaga gawas sa pagtunol sa iyang pitaka ngadto sa mga tulisan gumikan kay naghunahuna kini sa nahitabo ni SPO4 Asterio Butron nga gipusil patay sa tulo usab ka mga tulisan.
Matud pa ni Limbaga nga mga importanteng dokumento naa sulod sa maong pitaka lakip na ang kinitaan niini nga usa ka libo ka pesos.
Gumikan niini mitaho dayon sa kapolisan sa Station 2 si Limbaga ug sa dihang kini miresponde pakyas kini sa pagsikop sa mga responsableng tulisan nga gibanabana nga nagpangedaron og 20 anyos pataas ug mga yagpison og mga panglawas.