Nagbagolbol karon ang mga Barangay Health Workers (BHW) sa siyudad sa Sugbu tungod sa nalangay nilang honorarium.
Basi sa nadawat nga reklamo sa Banat News, wala pa ma-release ang honorarium sa mga BHW sukad niadtong miaging buwan sa Enero.
Kini gikompirmar ni Gloria Abadiano, ang presidente sa kapunungan sa mga BHW sa habagatang distrito sa dakbayan.
Gipadayag hinoon ni Abadiano nga sagad nilang masinati ang kalangay sa ilang honorarium sa unang bahin sa tuig.
Apan giangkon ni Abadiano nga siya lakip sa nahibulong tungod kay niabot na lang ang buwan sa Mayo, wala gihapon ma-release ang ilang honorarium.
Ang mga BHW giingong magdawatan og P3 mil nga honorarium matag buwan gikan sa kagamhanan sa dakbayan, wala pay labot ang counterpart sa barangay niini.
Nasayran gikan kang Abadiano nga dunay kinatibuk-ang 375 ka mga BHW ang 80 ka mga barangay sa siyudad.
Ang Banat News nagpakisayod sa City Hall labot sa maong kalangay ug nasayran nga dili kakuwang sa pundo ang hinungdan niini.
Matod ni City Administrator Bimbo Fernandez nga nalangay ang pag-release sa honorarium tungod kay gi-review pa ang mga BHW sa dakbayan.
Sumala ni Fernandez nga ang presidente sa ABC nga si Eugenio “Jingjing” Faelnar, maoy ilang gisangunan sa pag-evaluate sa mga BHW.
Niingon ang City Administrator nga siya mismo maoy mupursigir kang Faelnar aron madali ang pag-review niini aron usab mahatag na ang nalangay nga honorarium.
Nidugang si Fernandez nga nasayod na si Mayor Tomas Osmeña sa maong problema ug gusto usab niini nga mahatag na ang gipaabot sa mga BHW.
“Dili pa lang gyud mi dugay nga nag-meeting si mayor bahin ana uban kang konsehal Alix ug nimando na si mayor nga ipadali na pag-review ni Jingjing,”matod ni Fernandez.
Gipasalig sa City Administrator ngadto sa mga BHW nga magpaabot lang og pipila ka mga adlaw tungod kay giingong i-release ra sa siyudad ang honorarium niini.