Human trafficking misaka sa Sugbu

Misaka gihapon ang kaso sa Human trafficking sa probinsya sa Sugbu diin mga menor de edad ang kasagarang mabiktima niini sumala pa ni Marivic Garces, pangulo sa Provincial Social Welfare and Development Office (PSWDO) nga kasagaran sa mga kaso sa child trafficking nahitabo sa mga lungsod ug siyudad nga dunay mga pantalan.

Kini sama sa lungsod sa Santander, San Remegio, Daan Bantayan, Bantayan Island, dakbayan sa Bogo lakip na ang isla sa Camotes.

Miingon si Garces nga ang kagamhanan sa probinsya sa Sugbu pinaagi usab sa abag sa ubang ahensya sa kagamhanan mihimo na og lakang aron masumpo kining maong illegal nga kalihokan.

Nunot niini, usa ka provincial task force against human trafficking, pornography ug cybersex ang giumol sa kagamhanan sa probinsya sa Sugbu.

Kini aron tahasan pakigbatok sa nahisgutang mga iligal nga kalihokan. Mga sakop sa kapolisan, Non Government organizations (NGO’S) ug ubang ahensya sa kagamhanan maoy miyembro sa task force.

Sa gipahigayong consultative meeting sa miaging adlaw diha sa Kapitolyo gitug-an ni bokal Agnes Magpale, chairman sa Committee on Womens and Children sa Hunta probinsyal sa Sugbu nga nagpadayon gihapon ang pagsaka sa kaso sa pornograpiya ug human trafficking sa lalawigan.

Matud pa sa bokal nga aron masumpo kining maong matang sa iligal nga kalihokan gikinahanglan usab ang koordinasyon sa publiko lakip na ang ubang ahensya sa kagamhanan labi na ang kapolisan nga hatagan og pagpakabana. (Rey B. Pasaporte)