AFP chief of staff wa mosulting NPA di kaya
Giklaro ni AFP Chief of Staff Lt.General Alexander Yano ang nigawas nga report sa kauluhan nga siya miangkong dili gyud mapuhag ang insurhensiya sa nasud.
Si Yano nagkanayon nga wala siya mosulting dili kini mahimo sa militar kundili iyang gipasabot nga dili gyud mahitabo nga “zero level” gyud ang pagpapas sa rebelyon sa mga komunistang rebelde.
Matud pang Yano nga ang mahimo sa AFP mao ra ang pagpagamay sa gidaghanon sa mga rebelde ug sa kapabilidad niini sa level nga makaya na sa kapolisan ang pakig-atubang kanila.
“We can’t wipe out the entire insurgency up to the “zero level” what I mean is, we may not be able to totally eradicate insurgency to zero level but we can make them into inconsequential level, to reduce them into ordinary criminals that could be taken cared of by internal law enforcement units,” asoy pang Yano.
Sumala pa niini kung mamenusan na gyud ang gidaghanon ug ang kapabilidad sa mga rebelde ug mahisama nalang sa mga ordinaryong kriminal dili na malisod alang sa kapolisan ang paggukod kanila ug pagtaral kanila sa korte.
Si Presidente Gloria Macapagal Arroyo nagtinguha nga sa pagtapos sa iyang termino sa 2010 mapapas na ang insurhensya sa nasud pinaagi sa pagpaabot sa mga serbisyo sa gobiyerno ngadto sa mga kabukiran ug sa mga kabus.
Ang papel sa militar mao ang paghatag og seguridad sa mga proyektong gipasiugdahan sa gobiyerno sama sa mga dalan, imprastraktura, transportasyon ug mga umahan diha sa mga lugar nga apektado sa insurhensya.
Samtang dako usab ang pagsalig ni Yano sa bag-ong natudlong Army Commanding General nga si Lt. Gen. Victor Ibrado sa kasinatian niini sa trabaho tungod sa taas niining eksperiyensya sa field. (Edwin Ian Melecio)
- Latest
- Trending
