Miprotesta nga kandidato sa pagka-kapitan sa barangay San Isidro, dakbayan sa Talisay nga si Marieta Bucao naglaom nga makalingkod na siya sa pwesto human sa desisyon ni Talisay Municipal Trial Court Judge Mario Manayon.
Si Bucao sa pakighinabi niini sa Banat News kagahapon sa buntag mibutyag nga niadtong Martes na-grant na ang iyang gidusong “motion for execution” sa promulgation sa nahisgutang kaso.
Niadtong Lunes sa milabay'ng semana ang kampo ni Bucao miduso dayon sa maong motion human mahukmi ni Manayon nga si Bucao ang nakadaog niadtong eleksiyon sa barangay sa milabay'ng tuig ug dili si Kapitan Maria Adelaida Restauro.
Kahinumduman nga si Bucao ang miduso og protesta ug mipausab paihap sa 21 ka ballot boxes ug nasuta nga milabaw siya og 68 botos kang Restauro.
Ang San Isidro ang adunay 37 ka presinto apan ang duha niini gi-cluster o gitipon.
Gitataw ni Bucao nga gipausab niya og paihap ang mga balota tungod sa iyang pagduda human sa ilang gipahigayong survey nga siya maoy milabaw.
Ang nahisgutang promulgation ang gipahigayon unta niadtong Abril 22 apan nauswag kini niadtong petsa 2 niining buwana human ang habig ni Restauro miduso og motion aron dili una mapadayon ang promulgation.
Pagka Mayo 2 miduso na usab og laing motion ang kampo ni Restauro aron dili na usab mahinayon ang promulgation apan gibasura na kini ni Manayon.
Si Bucao nagkanayon nga human sa promulgation usa ka semana ang milabay, adlaw nga Lunes miduso na dayon siya sa iyang “motion for execution pending appeal” ug pagka-Biyernes sa milabay'ng semana gipahigayon na ang hearing alang sa ilang motion.Matud ni Bucao nga gibati siya og kabalaka nga mo-inhibit si Manayon sa kaso ug malangan kini human ang kampo ni Restauro miduso og kasong administratiba batok kang Manayon.
Si Bucao mibutyag nga human sa 20 ka adlaw si Manayon kinahanglang moluwat og “writ of execution”, kung walay makuha nga Temporary Restraining Order (TRO) ang habig ni Restauro posibleng makalingkod na gyud siya sa pwesto karong Hunyo 9.
Ug isip mao nay modala sa renda aduna siya’y katungod nga mopili sa iyang mga sakop apan adunay ipahigayong evaluation ug andam na usab ang ilang kampo sa mga mosunod nga hitabo.