Masakiton naghikot og pisi sa manok sa liog

Patay na nga napalgan ang usa ka 68-anyos nga lalaki human kini giingong naghikog tungod sa gihambin nga sakit kagahapon sa alas 10:15 sa buntag sa Ramona Village 2, barangay San Isidro, dakbayan sa Talisay.

Ang gituuhang naghikog giila ni PO2 Erwin Carbonquillo polis sa Talisay nga si Cecelio Malubay, residente sa maong lugar.

Sa pakighinabi sa Banat News kang Carbonquillo kini mibutyag nga gidudahan sa mga paryente ni Malubay nga tungod kay wala na kini makaagwanta sa gihambing sakit maong kini naghikog.

Nasuta nga usa ka semana nang milabay gitauran kini og catheter aron makaihi tungod sa maong sakit human makagawas gikan sa Talisay District Hospital human kini atakeha sa high blood.

Sukad niadto gikatahong magul-anon na kini sa milabay'ng pila ka adlaw.

Kagahapon sa buntag nakit-an na lang kini sa iyang 10-anyos nga apo diha sa kasagingan nga dunay higot nga pisi sa manok ang liog nga gikutay ngadto sa punoan sa saging.

Si Carbonquillo nagkanayon nga natumba ang saging nga giingong gihikogan ni Malubay ug ang catheter niini natangtang na.

Ang mga umagad ni Malubay nga sila si Isabelo Canonigo ug Jessie Locsin mao nay mitangtang sa pisi sa liog ug midala kaniya sulod sa ilang balay sanglit gikatahong wala usab silay kwartang ikabayad sa tambalanan.