Patay nang nakit-an ang usa ka panadero sa usa ka bakery sa barangay Poblacion siyudad sa Danao niadtong Miyerkules sa alas 4:00 sa kaadlawon.
Ang biktima giila sa kapulisan nga si Alexis Indang, 30, lumad nga taga barangay Binggay lungsod sa Borbon apan nagtrabaho isip stay-in baker sa maong tindahan.
Ang kauban niini sa trabaho nga si Christy Indang Quilaton, maoy nakakita sa iyang kauban nianang pagka kaadlawon nga naghigda sa semento nga wala nay kinabuhi.
Ang patay'ng lawas sa biktima kasamtangang gipahiluna sa Saint Jude Funeral Parlor samtang sa paghimo ning balita gitakda pa kining ipaawtopsiya aron pagtino kun wala bay foul play ang kamatayun niini.