Duha ang gipusil sa disko

Duha ka mga tawo ang gipamusil sa wala mailhing tawo samtang nitambong og disko atol sa bisperas sa kapistahan kagahapon sa kaadlawon diha sulod sa basketball court sa sitio Bangon sa barangay Caputatan sa lungsod sa Medellin.

Ang mga biktima giila sa kapolisan nga sila si Aldin Dela Peña, 34, minyo ug Mariano Batusin Jr., 30, ang duha pulos molupyo sa naasoy'ng lugar.

Si SPOI Alfredo Lima-lima nahinabi sa Banat News miingon nga duna na silay nailhan nga suspek sa maong hitabo base sa mga nakasaksi apan nagdumili pa kini sa pagbutyag sa pangan niini.

Ang mamumuno gikatahong nagsul-ob kini og camouflage atol sa pagpamusil. Subay sa imbestigasyon sa kapolisan sa crime scene nagbutyag ang duha ka biktima parehong diha sa sulod sa korte kay nitambong og disko.

Apan kalit lang nisulod ang wala mailhing mamumuno ug gipamusil ang duha sa walay igong rason.

Si Dela Peña nakaangkon og samad pinusilan sa ibabaw ug luyong bahin sa lawas samtang si Batusin natapsingan ang walang dalunggan niini.

Ang duha daling gihatud sa Verallo Memorial Hospital sa siyudad sa Bogo apan si Dela Peña ang girekomendar sa mga doctor nga ibalhin og laing tambalanan dinhi sa dakbayan sa Sugbu.

Dugang nahipos sa kapolisan usa ka Joel Cabucos, tanod sa maong lugar, miasoy sa kapolisan nga iyang nakit-an ang mamumuno human gipusil niini si Dela Peña ug iyang gisukmag.

Tungod niini si Cabucos na hinuon ang gipusil sa maong suspek katulo ka higayon apan wala makaigo ug nidagan paingon sa duha ka laing wala mailhing kauban nga diha sa motorsiklo dayong sakay og nipasirit palayo sa lugar.

Matud ni SPOI Lima-lima nga posibleng gipareglahan o ba kaha gisuyaan ang duha ka mga biktima.