69-anyos gisungag sa motor patay

Namatay ang usa ka 69 anyos nga lola human mabangga-i og motorsiklo samtang naglakaw sa karsada sa barangay Old Bago lungsod sa Asturias, Cebu niadtong Martes sa ala      1:00 sa hapon.

Ang biktimang namatay sa tambalanan giila nga si Leoncia Villafranca Trocio, 69, molupyo sa nahisgutang lugar.

Samtang ang drayber sa motorsiklo nga nakabangga kaniya giila sa kapulisan nga si Jolito Maglinte Gotgot, 20, molupyo sa Lower Lunas, barangay Lunas sakop sa nahisgutang lungsod.

Matod ni SPO1 Dennis Nocos sa Asturias Police dihang nahinabi sa Banat News ang biktima naglakaw daplin sa dalan samtang si Gotgot kusog kaayong nagpadagan gikan sa barangay Sta. Lucia paingon sa lungsod sa Tuburan.

“Kusog kaayo ang iyang padagan sa motor unya namidpid man kuno ni sa daplin didto nadam-agan ang biktima nga naglakaw adtong tungura,” dugang asoy ni SPO1 Nocos.

Gidugang ni SPO1 Nocos nga nagtalikod nga naglakaw ang biktima hinungdan nga wala gyud kini makabantay sa motorsiklo ug matod pa sa mga nakasaksi nalagpot ang biktima pag-igo sa motor ug nalabay og pipila ka metros una pa nabunal ang ulo niini.

Gidali pagdala sa tambalanan ang biktima sa maong lugar apan nianang pagka alas 7:00 sa gabii sa susamang adlaw namatay kini.Dugang nahipos nga impormasyon sa kapulisan nakainom ang suspek nga nagmaneho sa iyang motorsiklo sa pagkahitabo.

Matod ni SPO1 Nocos kagahapong adlawa pormal nang gipasaka ang kasong reckless imprudence resulting to homicide batok sa suspek nga nagtingkagol na karun sa detention cell sa maong lungsod.