Subling gipahinumduman ni Bise Mayor Michael Rama ang Cebu City Disaster Coordinating Council pag-atiman sa problema sa mga namuyo daplin sa kasapaan sa dakbayan.
Gusto ni Rama nga ma-relocate na ang nahisgutang mga molupyo sa maong mga dapit samtang dili pa awahi ang tanan ug wala pay kadaut nga nahiaguman.
Kini tungod usab sa mga pag-uwan nga nasinati karon sa siyudad nga giingong posible nga moresulta unya sa mga pagbaha.
Mokapin sa dos mil ka mga molupyo daplin sa kasapaan sa dakbayan ang natumbok na sa CCDCC nga delikadong mabanlas kun dunay baha.
“Ang gikinahanglan ana, pagtutok, let us not wait for a tragedy to occur when we could have responded it out of the dangerous situation,” sumala pa ni Rama.
Gipalabtikan usab ni Rama ang kadali ra sa pagpa-demolish sa siyudad sa ubang mga squatters maong wala say rason nga dili kini mahimo sa mga molupyo daplin sa mga sapa.
Apan ang chairman sa CCDCC nga si Konsehal Gerardo Carillo nitataw nga dili nila madali ang pagpapahawa sa libuan ka mga molupyo kung walay maayong relocation site.
Gipadayag sa konsehal nga duna nay nakit-an ang dakbayan nga himoong relocation site alang niini, apan nasayran sa Banat News nga kini wala pa ma-develop.
Niingon si Carillo nga kini maoy nag-unang hinungdan nga ilang gihinay-hinayan ang paghawan sa three meter easement sa kasapaan sa dakbayan.
“It will take sometime, dili gyod madali nato ang pag-relocate sa mga mulopyo daplin sa kasapaan mao nga ato lang gihinay-hinayan sa pagpatuman,” nagkanayon si Carillo.
Nasayran gikan sa konsehal nga ang giuna sa CCDCC paghawan mao ang daplin sa sapa habig sa barangay Pasil ug Ermita.
Apan gusto ni Bise Mayor Rama nga magpatabang sa nasudnong kagamhanan sa pagsulbad sa maong problema aron kahatagan gilayon og dinaliang solusyon.