Gipanghimakak sa pamilyang Comandao nga nalambigit si Retired PAF Master Sergeant Henry Comandao sa mga namatay nga miyembro sa Budol gang nga gi-ambush sa barangay Kalunasan sa milabay'ng gabii.
Personal nga mipakita ngadto sa Homicide Section sa Cebu City Police Office ang asawa ni Comandao kinsa mihangyong di magpahingalan ug ang kinugos nga maoy gikontrata sa magtiayong Magno.
Matod pa sa asawa ni Comandao nga dili tinuod nga managkaila ang magtiayong Magno ug ang iyang bana.
Giklaro sa asawa nga dili V-hire ang maong sakyanan, gipakita sa asawa ang text message sa iyang bana ngadto ni Evelyn Magno “kung unsaon nako pag-ila ninyo” ug ang tubag ni Evelyn Magno nga “Nagsul-ob ko og maong ug magbutang og hood sa ulo,” nagpasabot nga dili gyud sila managkaila.
Matod pa sa kinugos kinsa nagtrabaho sa usa ka law firm giduol siya ni Evelyn Magno sa Kapitolyo ug nagpatabang tungod sa kaso ug dihang ni-request kini og masakyan girekomendar niya ang van sa iyang maninong nga si Comandao.
Si Comandao 20 ka tuig sa PAF, nahimo kining ROTC/CMT Commandant sa mga tunghaan ug napiling PTCA Federation President sa Lapulapu ug karon kasamtangang sakop sa Lupong Tagapamayapa sa barangay Basak dakbayan sa Lapulapu ug presidente sa Cebu-Mactan V-Hire Operator’s Association Inc.