Gagmay'ng baroto gidid-an paglawig

Tungod sa dili maayong kahimtang sa panahon nga niresulta sa kusog nga hangin ug pagka baworon sa kadagatan, gisuspenso dayun sa Cebu Coastguard ang paglawig sa tanang mga gagmay'ng sakyanan sa kadagatan aron paglikay sa mga aksidente.

Gibutyag ni Lt. Paulo Abejuela, ang operations chief sa Cebu Coastguard  Central Eastern Visayas district dihang nahinabi sa Banat News sugod alas 8:00 kagahapon sa buntag suspendido na ang mga biyahe sa mga gagmay'ng sakyanan sa dagat.

Gitumbok niya ang mga fastcraft ug mga motorbanca nga dili makasugakod sa mga dagkung bawod ug kusog nga hangin sa dagat.

Gani sayo kagahapon sa buntag dunay usa ka fastcraft nga nisuway og biyahe gikan sa pantalan dinhi sa Sugbo paingon unta sa Dumaguete City apan napugos kini og balik tungod sa dagkong bawod ug hangin.

Matod ni Abejuela nga ang mga gagmay'ng barko nga minos sa one thousand gross tonnage maoy wala tuguting makalawig.

Giklaro usab ni Abejuela nga dili na usab sila karun makaderitso og suspenso sa mga biyahe sa barko tungod sa bag-ong circular nga giluwatan sa ilang ulohang buhatan nga naghatag og katungod sa mga kapitan sa barko nga makadesisyon kun angay bang suspensuhon o dili ang biyahe niini.

Sa laing bahin, usa ka mananagat nga taga barangay Langtad lungsod sa Argao ang na-smissing sukad pa niadtong Lunes sa alas 4:00 sa kaadlawon.

Nasayran gikan kang PO1 Eduardo Semilla sa Argao Police dihang nahinabi sa Banat News ang na-missing nga mananagat giila nga si Roselie Zita Zamora, 30, taga Langtad, Argao.

Nigikan sa ilang balay si Zamora alas 4:00 sa kaadlawon niadtong Lunes aron sa pagpanagat sakay sa iyang pumpboat nga dunay tatak Sto. Rosario apan wala na kini mabalik sukad kagahapon.