Mingaw ang transport strike sa Sugbu

Mingaw pa sa tirana ang transport strike dinhi sa dakbayan sa Sugbo kagahapong adlawa isip paghatag og suporta sa ilang mga kaubanan didto sa Metro Manila nga nanawagan sa gobyerno sa pagpa-us-os sa presyo sa mga produktong petrolyo.

Si Cebu City Police Office Chief Patrocinio Comendador nga gikahinabi sa mga tigbalita kagahapong adlawa mipadayag nga gamay ra kaayo ang misalmot sa maong transport strike diin sagad mga sakop lang sa Nagkahiusang Driver sa Sugbo (NADSU) isip paghatag sa suporta sa ilang mga kauban nga Pinag-isang Samahan ng mga Tsuper-Operator Nationwide (PISTON).

Gani ang mga sakop sa Nadsu dali kaayong nagbulagbulag sa ilang mga sakop atol sa gipahigayong kalihukan niini kagahapong adlawa, labi na usab nga dili maayo ang dagan sa panahon.

Gawas pa niini, ang mga lihok-protesta dinhi sa dakbayan gihatagan og igong kahigayonan nga makapadayag sa ilang buot ipaabot ngadto sa gobyerno.

Samtang kun adunay transport strike lig-on usab kaayo ang local government units sa dakbayan sa Sugbo nga makapadagan sa ilang ubay-ubay nga mga Bus nga ma-deploy sa mga lugar nga walay mobiyahing pasaheroan.

Samtang si Ruben Rama, ang secretary general sa NADSU nga gikahinabi sa Banat News mipadayag nga bisan pa man sa dautang panahon nakapadayag sila sa ilang sentimento sa gipahigayong “people’s protest” kagahapon.

Sumala pa niini nga moabot sa 200 nila ka mga sakop ang misalmot kagahapong adlawa diin una niini ang 24 ka multicab nga gikan sa Mandaue mipahigayon og caravan.

Nag-abot ang ilang mga kauban nianang pagka-alas 9 sa buntag sa buhatan sa Land Transportation Franchising and Regulatory Board (LTFRB-7) ug pagkahuman niini mideretso  sila sa Land Transportation Office (LTO-7) ingon man sa buhatan sa Department of Energy (DOE-) ug gitapos nianang pagka-alas 10 sa buntag.

Padayon nilang gipangayo ang P1.50 nga umento sa pletihan sukad niadtong 2004 sa ingon ang minimum nga pletihan sa mga PUJ mamahimo nang P7.50.

Gitataw usab niini nga dili usab nila madawat ang gipadayag ni LTFRB-7 director Romulo Bernaldes atol sa pag-atubang niini ngadto kanila kagahapon nga adunay gikasabutan sa kauluhan nga .50 sentimos lang ihatag nga umento.