Pumpboat nalunod; 4 pasahero luwas

Luwas na ang upat ka mga tawo nga luwan sa usa ka pumpboat nga nalunod duol sa Isla sa Pangan-an, Olango Island dakbayan sa Lapulapu sa milabay’ng hapon.

 Base sa taho ni Insp. Junnel Caadlawon, hepe sa kapolisan sa Isla sa Olango nga nakadawat sila og taho nga dunay pumpboat nga nalunod sa maong dapit mga alas 4 sa milabay'ng hapon hinungdan nga iyang gialerto   iyang mga tawo.

 Base sa feedback sa iyang mga sakop nasuta nga luwas tanang mga biktima sa maong pumpboat ug kini naila nga sila si  Rosalinda Malinao, 47, Reynan Malinao, 18, Ailene Bauyaban, 38, ug Richel Pino, 18, pulos mga residente sa Marigondon dakbayan sa Lapulau

 Sa pasiunang report nga nasayran sa Banat News nga gikan ang maong pumpboat sa Pandanon, Bohol ug padulong kini sa Marigondon, dakbayan sa Lapulapu apan nakasugat kini og makusog nga hangin ug balod habig sa isla sa Pangan-an hinungdan sa pagtikyaob sa maong pumpboat.

 Naluwas ang mga biktima sa dihang miabot ang laing pumpboat nga gipanag-iya ni Susan Albano ug hinuon wala nay kabalak-an ang mga kabanay niini.