Duha ka mga menor de edad nga tinun-an sa high school ang naluwas sa mga polis sa Talamban gikan sa grupo sa mga gituuhang miyembro og gang atol sa gipahigayong initiation rites sa grupo diha sa Nashville, Talamban kagahapon sa kaadlawon.
Ang naluwas parehong nag-edad og 17-anyos taga Nasipit, Talamban ug ang usa taga Consolacion apan parehong mga tinun-an sa Banilad National High School nga parehong nakaangkon og mga bun-og sa ilang bitiis ug sampot tungod sa pagbunal kanila og paddle.
Apan matud pang PO1 Irene Velasco sa Talamban Police Station sa pakighinabi sa Banat News nagdumili ang duha sa pagtug-an sa pangalan sa ilang grupo ug kung si kinsa ang mga nag-rekrut kanila.
“Dili gyud sila motug-an gawas lang sa gibanggit nga pangalan sa grupo pero pagpangutana namo sa spelling sa pangalan sa grupo wala man sad mosulti. Nitug-an hinuon sila nga gibunalan daw sila pero kay wala man silay sala pag-abot sa mga polis wala nalang sila managan,” asoy pang Velasco.
Ang mga sakop sa Miscellaneous team sa Talamban nakadawat og tawag sa telepono gikan sa usa ka residente sa nahisgutang dapit nga dunay mga batan-ong nagpahigayon og initiation sa maong lugar.
Apan sa pag-abot sa mga polis nakabantay ang grupo ug nag-iyahay og panagan samtang nahabilin ang duha ka batan-on nga niadtong tungura gikatahong nangabun-og na sa pagpuli-puli og bunal sa paddle.
Nakuha diha sa dapit ang usa ka paddle apan walay marka o pangalan sa grupo. Nagtuo hinuon ang kapolisan nga gang ang maong grupo.
Ang duha gidala ngadto sa tambalanan aron masusi ang ilang mga bun-og ug gipahibalo ang ilang mga ginikanan.
Matud pa sa inahan sa biktimang taga Nasipit gikuha ra ang iyang anak sa mga batan-ong iyang gituuhang mga higala niini ug gani gipakaon pa niya kini.
Apan ang mga batan-on gikatahong nagdumili paghatag og pamahayag aron pormal nga makapasaka og kaso batok sa mga miyembro sa maong gang.