Magsuon gitulis sa kaubang pasahero

Duha ka mga managsuong babaye ang nabiktima sa pagpanulis sa tulo ka mga tulisan nga ilang gikasakay sa PUJ kagahapon sa alas 10:15 sa buntag diha sa dalan MJ Cuenco barangay San Roque ning dakbayan.

Ang mga biktima giila sa kapolisan nga sila si Lenelle Joie Austria 22,  Maria Eden Austria, 17, nga taga La Paloma Village barangay Tisa.

Ang duha ka managsuon nakuhaan sa ilang tagsa-tagsa ka cellpone P200 nga salapi ug uban pang mga personal nga butang dihang gitiunan og armas sa usa sa mga tulisan.

Si SPO3 Ernesto Caballero sa Waterfront Police Station nga gikahinabi sa Banat News nagkanayon nga ang managsuon nitug-an nga luwan sila sa 12-G nga PUJ niadtong higayona dihang kalit lang silang gitiunan sa kalibre .22 nga pusil sa usa sa mga tulisan nga nagpakaaron-ingnon mga pasahero ug gipangkuha ang ilang mga butang.

Ang mga biktima mihulagway sa mga tulisan nga mga batan-on pa ug kasarangan ang pamayhon ingon man ang mga panglawas niini.