Sikyu nga nagmaoy gidakop

Gidakop ang usa ka security guard human magmaoy tungod sa grabeng kahubog ug nagpasalba sa armas nga nakapalisang sa mga silingan niini sa sitio Drilling, barangay Luray-II siyudad sa Toledo niadtong Biyernes sa alas 4:10 sa hapon.

Ang gidakop mao si Robinson Carbelida Epile, 38, molupyo sa nahisgutang lugar ug konektado sa Milgos Security Agency nga nagbase sa sitio Lawis barangay Lura, Toledo City.

Ang kapulisan sa Toledo nakadawat og tawag sa telepono gikan sa usa ka concerned citizen ug nipahibalo nga ang maong gwardiya hubog niadtong tungura nagbitbit og armas ug nagpasalba

Daling niresponde ang kapulisan pinangulohan sa hepe nga si Supt. Julian Entoma ug mga sakop nga sila si SPO3 Allan Barquin, SPO2 Thadeo Lapining, SPO1 Revelito Tadique og PO3 Eliseo Paquit ug na-abtan nila ang suspek nga nagbitbit sa armas niining kargada niadtong tungura.

Dihang gisukitsukit sa kapulisan walay gikapakitang mga dokumento si Carbelida nga magpamatuod nga dunay lisensiya ug makahimo siya sa pagdaladala og 38 rebolber nga may upat ka buhing bala hinungdan nga gidakop kini sa mga polis.