Iduso sa Cebu City Disaster Coordinating Council (CCDCC) ngadto sa konseho sa siyudad ang paghatag og financial assistance ngadto sa mga molupyo sa barangay Sinsin nga apektado sa nahitabong landslide sa miaging semana.
Kini human aprubahi sa CCDCC ang resolusyon sa nahisgutang barangay nga nangayo og hinabang financial, human usab morekomendar ang Mines and Geo-Sciences Bureau (MGB-7) nga i-relocate ang apektadong mga molupyo.Dunay 41 ka mga pamilya ang gitumbok sa MGB-7 nga delikado sa pagdahili sa yuta diha sa barangay Sinsin kung dunay laing mga pag-uwan nga masinati ang dakbayan ug kini giingong angayan na nga ibalhin sa mas luwas nga lugar samtang dili pa awahi ang tanan.
Ang chairman sa CCDCC nga si Konsehal Gerardo Carillo maoy moduso sa resolusyon ngadto sa City Council atol sa sesyon sa konseho karong Miyerkules nga maggahin og pundo isip financial assistance sa i-relocate nga mga pamilya.
Girekomendar sa konsesho sa barangay Sinsin nga mahatagan og tag P5 mil ang matag pamilya nga pabalhinon sa mas luwas nga dapit hinungdan nga nanginahanglan ang City Council og kapin sa P200 mil alang niini.
Mahimo na hinoong adto kuhaon sa calamity fund sa siyudad ang nahisgutang gahin human usab ideklarar sa konseho ubos sa calamity area ang unom ka mga bukirang barangay sa dakbayan nga naglakip sa barangay Sinsin.
Lakip sa girekomendar sa MGB-7 atol sa gipahigayong tigom sa CCDCC mao ang pag-cordon sa dapit ingon man niadtong mga lugar sa barangay nga nangliki, gawas sa pagbutang niini og mga warning signs.
Ang konseho sa dakbayan nigahin na og dul-an sa P200 mil alang sa pagkuha og kontraktor nga maoy mopahigayon og feasibility study alang sa posibleng pagbutang og “geo-textile technology” diin bulitan ang yuta aron dili na modahili.