Kuli na nga duna pay mamahimong kausaban sa panagpares ni City Hall Education Consultant Joy Augustus Young sa 2010 elections.
Kini maoy gipadayag ni Bise Mayor Michael Rama, human usab ibutyag ni Mayor Tomas Osmeña nga ang bise mayor maoy iyang ituboy hulip kaniya sa umaabot nga piniliay.
Samtang si Young usab ang gipahibawo sa mayor nga maoy iyang ipares kang Rama isip bise mayor sa ilang partido sa 2010 elections.
Matud ni Rama nga lisod na nga duna pay mahitabong kausaban sa gibutyag nga tandem ni Osmeña tungod sa iyang pagkahibawo sa pagkatawo niini.
“I have not remembered insofar sa akong experience with the mayor that when he made a statement, unless extremely necessary, changes will come,” sumala ni Rama.
“Knowing well the mayor, if he made a statement, he will always stand his statement,” dugang pamahayag sa bise mayor.
Gipadayag ni Rama nga walay problema kaniya kung si Young maoy iyang ikapares sa umaabot nga piniliay, tungod kay iya usab kining kauban sa grupo.
Nagdumili hinoon ang bise mayor pagbutyag kung kinsa ang iyang gusto nga ikapares kung siya pa ang hatagan og higayon sa pagpili.
Nasayran sa Banat News nga dunay pipila ka mga sakop sa BOPK nga mas pabor kung si Konsehal Hilario Davide III maoy ikapares sa bise mayor.
Kini tungod kay alang kanila mas sayon nga ibaligya si Davide sa mga Sugbuanon tungod sa pagka-inila sa apelyedo niini.
Gani usa ka konsehal sa south district nga dili gustong magpahingalan nipadayag sa Banat News nga dili na sila maglisod nga ikampanya kung si Davide maoy ika-tandem ni Rama.
Apan matod sa bise mayor nga ang pagdugang og laing pangalan sa iyang ikapares sa 2010 elections, makahatag lang og komplikasyon sa sitwasyon.
Daghan hinoon ang nagtoo lakip na sa oposisyon, nga lig-on nga pares ang Rama-Young tandem sa BOPK sa umaabot nga piniliay.