Dugang mga pusil na-recover gikan sa bangka

Dugang mga armas ang nasakmit sa kapolisan human suwayan unta kining ipalusot paingon sa Masbate nga gisakay sa pumboat nga pasaheroan  sa pantalan sa barangay San Vicente siyudad sa Bogo niadtong Martes sa alas 8:00 sa buntag.

Matud ni PO1 Ryan Alarde sa Bogo City police station paingon na untang molarga ang pasaheroan nga pumpboat nga M/V MC Nel paingon sa Masbate dihang nipahigayon og inspection ang kapolisan pinangulohan ni SPO4 Florencio Ynot kauban ang upat ka anti crime volunteer sa maong siyudad.

Matud ni PO1 Alarde nakit-an ang tulo ka kalibre .357 revolver nga gisulod sa usa ka traveling bag nga gisakay na sa maong pumpboat nga gitabunan sa mga personal nga gamit sama sa sinena ug mga karsones.

Gikompirma ni PO1 Alarde nga walay serial number ang maong mga paltik nga pusil nga gituohang hinimo gikan sa siyudad sa Danao ug paingon na unta kining i-deliver didto sa Masbate.

Wala hinooy mga pasahero nga niangkon nga nanag-iya sa maong bag ug gituohan sa kapolisan nga gi-abandon kini sa tag-iya human makamatikod nga dunay gipahigayong inspection sa tanang mga bagahe sa pasahero.

Nasayran nga niadtong nilabay'ng bulan sa Abril lain-laing kalibre sa armas sama sa .357, kalibre .45 ug pipila ka silincer sa kalilbre .45 ang nasakmit usab sa kapolisan atol sa gipahigayong inspection sa usa sa mga pumpboat diha gihapon sa maong pantalan nga paingon untang ipalusot didto gihapon sa Masbate.

Ang maong mga armas kasamtangan karong gideposito sa buhatan sa kapolisan sa maong siyudad.