Porter gibuhian sa mga polis

Gibuhian sa kapolisan sa Presinto 2 sa Subangdaku Police Station sa dakbayan sa Mandaue ang usa ka porter sa Pier 7 nga gibalhog sa ilang detention cell sanglit napakyas sa pagpasaka og kaso ang  biktima nga maoy tag-iya sa nawagtang nga  maleta.

Si Charlito Panlubasan, 30-anyos, minyo nga taga sitio Aroma sa barangay Subangdaku porter sa Pier 7 sa maong dakbayan ang gidakop ni Emmanuel Loperez Abellana, 49, minyo nga taga Labangon, dakbayan sa Sugbo.

Ang pagdakop nahitabo dihang ang maleta nga maoy nalakip sa mga kargamento nga gialsa ni Panlubasan gikan sa barko nga midunggo sa maong pwerto ang kalit lang nga nawagtang.

Ang  maong maleta nga nawagtang maoy gisudlan sa mga dokumento nga giandam ni Abellana alang sa iyang paglarga paingon sa nasud sa Australia.

Si Abellana mibutyag ngadto sa kapolisan nga gikarga ni Panlubasan ang iyang kargamento gikan sa gikanaogan niyang barko paingon ngadto sa nagpaabot niyang sakyanan ug nahibilin ang maleta ug sa ilang pagbalik nahanaw  na kini sa gibutangan.

Ang biktima nga nagtinguha nga mahibalik og dali ang maong maleta ang midala kang Panlubasan sa Subangdaku Police Station alang sa imbestigasyon.

Samtang gipangatarongan usab ni Panlubasan nga ang maong butang nga nawagtang ang iyang gibilin sa pagtuo nga bantayan kini ni Abellana sa nahimutangan niini.

Si Panlubasan miingon nga balikon pa unta niya ang maong butang alang sa pagkarga ngadto sa sakyanan sa pagtuo nga dili usab molakaw sa pagsunod kaniya paingon sa nagpaabot nga sakyanan ang biktima.