Hepe sa Talisay traffic namahad kay napikal na?

Gibaharan sa hepe sa traffic division sa dakbayan sa Talisay ang mga magbugalbugal kaniya nga pasakaan niya og kasong libelo aron kapahamtangan og silot.

Si Senior Inspector Arcellano Bañares, hepe sa Talisay City Traffic Division (TCTD) mibati na og kapikal sa matag karon ug unya nga pagmansa sa iyang ngalan bugti sa iyang higpit nga pagpatuman sa balaod sa trapiko. 

Ang labing bag-ong kaso nga nakapapungot kang Bañares mao ang pagdaot sa iyang pagka-opisyal sa pasangil nga siya wala motahod sa usa ka konsehal sa siyudad kay gisikop niya ang drayber sa usa ka negosyante nga tag-iya sa Alfyn Marketing kinsa giingong suod sa maong opisyal sa dakbayan.

Kini may labot sa giingong bahad ni konsehal Sabeniano Abatayo nga kuhaan niya og  katungod si Bañares sa pagpang-isyu og temporary operator’s permit (TOP) ug citation ticket.

Nasayran nga dunay otorisasyon gikan kang Abatayo ang maong drayber nga makaparada sa atubangan sa ilang tindahan ug mao kini ang giingong nasagmuyoan ni Abatayo ngadto kang Bañares.

Apan matud ni Bañares nga dihang nabasa niya sa pamantalaan nga nasuko kaniya si Abatayo, iya dayong gipangita ang maong konsehal kay makig-estorya siya, apan mibiyahe kini ngadto sa gawas sa nasud ug hangtod karon wa pa mahiuli.

Gibutyag ni Bañares nga iyang gisikop ang drayber sa Alfyn Marketing kansang ngalan nakalimtan na niya kay ang gitugot nga oras nga  makaparada kini atubangan sa tindahan gikan lang sa alas 12:00 sa udto hangtud alas 2:00 sa hapon, apan miparadad kini nianang alas ll:00 pa sa buntag   hinungdan nga nasikop kini tungod kay nakalapas kini sa balaod sa trapiko.

Niadtong miaging mga buwan gipasanginlan usab siyang nangwarta dihang gisikop niya ug gisakmit ang video karera machine didto sa sitio Molave, barangay Tabunok.

Si Bañares nga gikan sa Mandaue City Traffic Division sulod na sa kapin 30 ka tuig nga serbisyo nagkanayon nga wala siya mabuhi sa binuang nga pangwarta ug ang iyang kasinatian bahin sa pagpadagan sa trapiko taas na kaayo.

Midugang kini nga ang iyang mga igsoon pulos dagko og ranggo sa nagkalain-laing ahensiya sa gobiyerno ug dili siya makaako sa paghugaw-hugaw sa ilang pamilya pinaagi sa dautang pangwarta.

Maoy hinungdan nga mikuha gyud siya og usa niya ka permanenteng abogado aron nga kutob sa magpakauwaw kaniya pasakaan niya og kaso sa korte aron kapahamtangan og silot, dugang pa sa hepe sa traffic division.