Mga kawani sa BID-7 wa mahimuot pagbalik ni Castro

Pipila ka mga kawani sa Bureau of Immigration and Deportation ang wala mahimuot sa pagbalik ni Cebu City Assistant City Prosecutor Mary Ann Castro sa ilang buhatan.

 Pipila ka mga reaksiyon sa mga empleyado sa matag departamento sa BID-7 mao nga gumikan sa iyang presensiya pagbalik sa maong buhatan makamugna na usab kini og laing hugna sa kagubot sama sa nahitabo sa milabay'ng tuig nga gihurot og kiha ni Castro ang mga empleyado sa maong buhatan.

Hinuon dunay uban nga mipadayag nga seguro aduna nay kalainan sa kinaiya ni Castro sa iyang pagbalik sa BID 7
Gani kagahapon usa ka babayeng gidala sa BID-7 aron ipaubos sa feng shui ang dapit nga mahimutangan sa iyang opisina sa ikatulong andana.        Subay niini, si BID-7 director Reynaldo Almaden mipadayag nga ang pagbalik ni Castro sa buhatan sa BID-7 aduna kini mando gikan sa ilang labaw sa BID ug sa Department of Justice.

Pormal nga milingkod si Castro niadtong Mayo 2.
Matud pa ni Almaden igo lang siya nagtuman sa mando sa iyang mga labaw ug iya usab nakita nga dunay kausaban sa maayong tratamento sa mga empleyado sa iyang buhatan ngadto kang Castro alang sa ilang hiniusang tumong sa pagpalambo sa buhatan sa BID-7.
Si Castro maoy modumala sa mga kasong administratiba sa BID-7 ug posibleng siya usab ang ibutang isip hearing officer sa mga langyaw nga angayang i-deport gumikan sa mga kasong gikalambigitan niini dinhi sa nasud.

 Kahinumduman nga si Castro ug kanhi BID-7 Director Geronimo Rosas nagkabangi gumikan sa isyu nga walay koordinasyon sa matag usa ug gumikan niini si Castro mibalos usab og pasaka og kaso batok sa tanang mga empleyado sa BID-7 ug kini gumikan sa pipila ka anomalosong transaksiyon nga nasigpatan ni Castro sa pamunoan ni Rosas.
Samtang si Rosas atua na sa NAIA terminal 2 nadestino isip maoy director sa BID sa maong tugpahanan. (Bong Soriano)