Nag-atang kasakyan gipusil sa nagmotor

Usa ka tawong nag-atang og sakyanan gipusil sa duha ka tawong nagsakay og motorsiklo sa  rotunda sa barangay Poblacion Dos, dakbayan sa Carcar niadtong Lunes sa gabii.

Ang naigo sa walang bahin sa tiyan nailhan nga si Geremae Villanueva, 38, lumad nga taga La Libertad, Negros Occidental, apan kasamtangang  nanimuyo sa barangay Tabunok, Talisay City.

Matud pa SPO3 Raffy Satera, sa Carcar Police Station nga nailhan usab dayon ang namusil  nga usa ka Odiong Lapena, taga sitio Dap, Poblacion Dos ug si Perry Lapinid taga barangay sitio Awayan, Poblacion 3.

Matud pa ni Satera nga nagsakay og motorsiklo ang duha diin si Lapena nga ig-agaw sa asawa sa biktima maoy nagmaneho sa sakyanan ug mihunong kini sa atubangan sa biktima ug way pupangutana ang nag-backride nga si Lapinid milanit dayon sa iyang armas ug gipusil ang biktima.

Natumba ang biktima sa yuta ug misirit dayon pahilayo ang mga suspetsado.

Gidali pagdala sa  Jesus Paras Memorial Hospital sa sitio Baraca, Poblacion Dos ang biktima, apan gibalhin  kini sa tambalanan  sa dakbayan sa Sugbo aron kahatagan dayon og epektibong tambal.

Padayon pang gipangita sa kapolisan ang mga suspetsado kay misirit dayon kini pahilayo human  sa hitabo.

May katahap ang kapolisan nga daan nang nagdinumtanay ang biktima ug suspetsado.