Lalaking nanunggab, gidunggab sad

Ubay-ubay nga samad dinunggaban ang nahiaguman sa usa ka tawo nga gipanimaslan   human kini manunggab   sa Sitio Matumbo barangay Pusok dakbayan sa Lapulapu kagahapon sa kaadlawon.

Ang biktima mao si Julius Tinapay, 24,  residente sa sitio Seawage Pusok dakbayan sa Lapulapu.

Samtang ang gitumbok nga suspetsado mao sila si Jonathan Arisala, 37  ug Roy Arisala, 26  nga mga residente sa maong dapit.

Base sa imbestigasyon ni  SPO1 William Homoc sa Homicide Section nasayran nga unang mitaho sa kapolisan sa dakbayan sa Lapulapu si Armeño Arisala, legal ang panuigon ug residente sa maong dapit nga siya gidunggab ni Tinapay mga 9:00 sa milabay'ng gabii ug sa dihang gipangita kini sa mirespondeng pulis wala na kini makita.

Apan mga ala 1:00 kagahapon sa kaadlawon nakita kini sa mga uyuan ni Armeño si Tinapay hinungdan nga nahitabo, ang karambola tali ni Tinapay ug sa magsoong Arisala.

Si Jonathan naigo    sa iyang  siko  ug sa dihang nagunitan kini ni Jonathan, si Roy usab ang midunggab ngadto ni Tinapay  makadaghang higayon.

Si Jonathan gidala sa Perpetual Soccor samtang si Tinapay gidala sa VSMMC ug sa pagsuwat ning balita anaa pa kini sa kritikal nga kondisyon.

Samtang si Roy Arisala nasikop  sa kapolisan ug gibalhug sa detention cell samtang nagpadayon ang ilang imbestigasyon.