Salisi gang naglihok dinhi

Mipahimangno sa Criminal Investigation and Detection Group –7 sa publiko kabahin sa tulo ka grupong gidudahang sakop sa Salisi Gang nga naglihok sa Metro Cebu ug ang mga target mao ang mga tawong mangadto sa mga malls.

Kini human dunay duha ka mga sakop niini ang nadakpan sa mga gwardiya sa usa ka dakong mall sa North Reclamation Area nga giilang sila si Alexis Suico nga gitumbok nga lider sa grupo ug si Ailyn Bacus human sila mamiktima og usa ka ginang.

Ang biktima giilang si Maria Eleanor Mangubat, inubanan sa house detective mao nay misikop sa duha ug diha makuha sa ilang mga posesyon ang bag ni Mangubat nga may sulod nga P11, 000 cash; duha ka cellphone ug mga ATM cards.

Ang duha misuway pa og sukol sa mga gwardiya apan nalupig sila ug naposasan ug daling gipahibalo ang ilang pagkasikop ngadto ni Supt. Rex Derilo sa CIDG-7.

Ang duha parehong gipasakaan og kasong theft sa CIDG-7 diha sa piskalya niadtong Abril 26.

Matud pang Derilo sagad biktimahon sa grupo mao kadtong dunay dalang mga bata ug samtang ma-busy ang biktima sa ilang mga anak ila usab kining ali-alihan aron gukdon ang bata sa ginikanan hinungdang nga malipat sila sa ilang mga gamit ug diha na salisihan og punit sa laing kakunsabo ang bag sa biktima.