Koleksyon sa BOC misaka

Milapas og 14.33% ang koleksiyon sa buhatan sa Bureau of Customs sa bulan sa Abril kung itandi kini sa ilang monthly target.

Kini ang giluwatang pamahayag ni Conrado Abarintos ang hepe sa Cash division sa Cebu Customs district office sa pakighinabi sa Banat News.

Matod pa ni Abarintos sa bulan sa Abril 2008 aduna  silay target nga 420 milyones ka pesos ug ang ilang actual collection mikabat kini og 480 milyones kapin ka pesos hinungdan nga milapas kini og 60 milyones kapin ka pesos diin 14.33% sa paglapas niini sa ilang target sa maong bulan.
Gikalipay usab kini ni Custom  District Collector Ricardo Belmonte gumikan kay bisan pa sa mga kontrobersiyal nga ang ilang ahensiya nalambigit sa car smuggling  napakita gihapon nila nga maayo ang ilang koleksiyon pinaagi sa ilang paningkamot nga pabayran sa insaktong buhis ang mga importers ug exporters.

Kahinumduman nga sa milabay'ng bulan sa Marso kulang lamang og 6 milyones kapin ka pesos ang ilang target sa maong bulan apan kung sumahon tanan alang sa 1st quarter sa ilang target collections kini milapas og 10.63 porsiyento nga    gikalipay usab ni Customs Commissioner Napoleon “Boy” Morales.