Natagak sa walog

Patay ang usa ka 54 anyos nga lalaki human aksidenting natagak sa walog sa kurbadahon nga dalan didto sa barangay Kal-anan, lungsod sa Tabogon, Cebu ang motorsiklo niining gisakyan niadtong Sabado sa kaadlawon.

Ang namatay giila sa kapolisan nga si Oscar Millang Juanillo, 54, minyo, taga barangay Combado sakop sa nahisgutang lungsod.

Matud ni SPO4 Anecito Manluluyo sa Tabogon Police Station sa dihang nahinabi sa Banat News sakay sa motorsiklo nga kolor itom ang biktima paingon sa sikbit nga barangay sa Loong aron unta sa pag-apas sa asawa niini.

Apan paghiabot sa maong kurbadahon giingong nawad-an sa preno ang motorsiklo niini ug aksidenting natagak sa walog nga dunay gibanabanang 10 ka tiil ang gilawmon daplin sa karsada ug gituohang nabunal ang ulo sa biktima sa pinutol nga punoan sa lubi nga maoy hinungdan sa hinanali niining kamatayon.

“Pag-responde didto buntag naman na siyang nakit-an mga alas 6 pasado nagluko didto unya dunay lupyak sa iyang agtang,”dugang asoy ni SPO4 Manluluyo.

Sa gihimong imbistigasyon sa kapolisan nasuta nga medyo nakainom ang biktima niadtong tungora ilabi na kay naatol nga bisperas usab sa pista sa barangay Kal-anan niadtong tungora…(Darrel A. Carumba)