P300 mil alahas, butang nadala sa mangingilad

Mokabat sa P300, 000 nga kantidad sa mga alahas ug mahalon nga mga butang sa usa ka doktora sa Sta. Lucia Subdivision sa Poblacion Oriental, lungsod sa Consolacion nasakiyo sa kawatan nga mangingilad nga nagluwan og sakyanan niadtong miaging adlaw.

Si SPO2 Romulo Sasing sa kapolisan sa maong lungsod nga nahinabi sa Banat News miila sa biktima nga mao si Dra. Ediza Ermac.

Dugang pa niya nga bugtong nahibilin ang katabang nga babaye ni Dra. Ermac dihang nahitabo ang pagsakiyo sa maong mga alahas sanglit didto kini sa iyang klinika sa dakbayan sa Mandaue.

Dugang pa niya nga nagsakiyo sa maong mga butang mao ang usa ka wala mailhing lalaki nga pustorawo ang pamarog ug nagsakay og awto nga Nissan Sentra.

Matud pa ni Sasing nga nagpakaaron-ingnon ang lalaki nga pag-umangkon ug nangutana sa katabang kun asa ang iyang Tita Ediza.

Sa dihang gitug-anan sa katabang nga atua kini sa iyang klinika sa dakbayan sa Mandaue ang maong lalaki mihangyo nga mosulod sa panimalay kay mogamit og telepono.

Si SPO2 Sasing miingon nga sa dihang gibutang na ang awditibo ang katabang gimandoan sa pag-ilis og sapot kay pakuyogon kini sa pag-adto sa klinika.

Nagdali sa pagsulod sa lawak ang katabang kay mag-ilis sa iyang sapot apan sa pagbalik og gawas sa katabang maoy namatikdan nga kalit lang nga nahanaw ang maong lalaki.

Nunot sa pagkahanaw sa maong wala mailhing lalaki ang mga alahas ug mga mahalon nga relo, perfume ug uban pa ang nahanaw usab ug gituohang gisakiyo niini.(Romeo T.  Limpangog)