Minor ang gipabantay sa V-karera

Usa ka menor de edad nga lalaki ug siyam ka mga video karera ug moli-moli ang nasakmit sa sudlonong bahin sa barangay Duljo-Fatima ning dakbayan kagahapon sa mga sakop sa Criminal Investigation and Intelligence Branch sa Cebu City Police Office.

Ang nadakpang 17-anyos mitug-an nga walay laing pangita ang iyang mga ginikanan aron ibuhi kanilang lima ka mga anak ug siya igo rang gipabantay sa inahan sa maong duha ka illegal gambling machine.

Ang kapolisan nga mironda gipanguluhan ni Supt. Paul Labra ug Sr. Insp. George Ylanan mironda sa maong dapit human sila makadawat og report ug impormasyon sa mga iligal na usab nga mga kalihukan ug sugalan sa maong lugar.

Ang pipila ka mga video karera gikatahong ila pang gigamitan og cutter sanglit gipangkadenahan kini ug kini gisulod sa gagmay kaayong mga lawak aron dili basta mamatikdan.

Ang maong mga makina gidala na ngadto sa buhatan sa Cebu City Hall samtang ang menor gi-turn-over ngadto sa Womens Desk.