Gipagawas na sa Cebu City Police Office ang cartographic sketch sa gunman nga mipusil ug miangol sa usa ka custom broker diha sa North Reclamation Area niadtong milabay'ng Miyerkules.
Ang maong gunman nga nagkalo og faded nga kolor pulang baseball cap gibana-banang 20 anyos pataas, 5’2 ngadto sa 5’3 ang height, kasarangan ang panglawas ug pamanit base sa gibutyag sa testigos sa insidente, samtang wala pa mailhi ang driver backup nga kauban niini.
Si Leonardo Abay-abay nga tag-iya sa LRA Custom Brokerage ug residente sa Garden Ridge sa barangay Cabangcalan dakbayan sa Mandaue. Ang biktima kasamtangang naglibot sa site diin tukuron ang iyang bag-ong opisina.
Samtang kini nagbarog diha sa gawas kalit siyang giduol sa gunman ug gipusil makausa ka higayon ug naigo kini diha sa likod. Nagtuo ang kapolisan nga .38 revolver ang armas nga gigamit kay walay basiyong nakuha diha sa crime scene.
Matud pang Comendador base sa estilo sa pagpamusil ug sa kalibre sa armas nga gigamit dili eksperto ang gunman ug posibleng suluguon lang kini nga misunod sa mando sa mastermind.
“There was not follow through, the gun is not a high caliber enough to finish the job,” asoy'ng Comendador.
Midumili hinuon kini pagbutyag kung nailhan na nila ang mastermind apan matud pang Comendador nakaila na sila sa gunman. Wala usab mobutyag si Comendador sa motibo sa pagpusil sa biktima gawas sa pag-ingon nga 80 porsiyento na sa anggulong gisubay sa imbestigasyon ang ilang nakab-ot.
“The motive and the identity of the suspect is closely related kay kung atong isulti ang motive makabantay na gyud ang mga perpetrators,” sumala pang Comendador.
Ang kapolisan nagsubay sa anggulong personal nga panagbangi ug sa negosyo niini.