Perigo wa kakita'g basehan aron relibuhan traffic chief

Hepe sa kapolisan sa dakbayan sa Talisay Superintendent Romeo Perigo sa pagkakaron nga wala pa siyay basehan nga palagputon ang hepe sa traffic division nga si Police Senior Inspector Arcelino Bañares.

Base sa taho nga adunay daghang reklamo batok kang Bañares kinsa milingkod sa pwesto puli kang SPO1 Joseph Glenn Burlas sa milabay'ng tulo ka buwan.

Gikataho usab nga ang reklamo ang naabot na sa buhatan ni Konsehal Sabeniano Abatayo, tsirman sa traffic commission.

Si Perigo mitataw nga wala siya’y nadawat nga reklamo ug  ang maong mga taho nahimo lang kining hunghongihong ug gani wala pa usab siya’y nadawat nga pormal nga impormasyon gikan kang Abatayo kabahin sa maong isyu.

Matud ni Perigo nga lisod kung ang ilang basehan pulos lang mga “tsismis” ug sa pagkakaron usa pa ang miluwat og pamahayag batok kang Bañares ug ubos pa kini sa imbestigasyon apan ang maong mireklamo ang gihuwat hangtod karon sa mga polis nga mobalik sa ilang buhatan.

Sa milabay'ng semana ang Alfyn Marketing ang mireklamo kang Bañares tungod kay gidakop ang drayber niini nga nagparada sa ilang sakyanan diha sa atubangan sa ilang tindahan sa Barangay Tabunok diin naghabwa kini og mga sinakong bugas bisan pa og mipakita ang drayber ngadto kang Bañares ug ni PO2 Lino Diez sa ilang permit gikan kang Abatayo nga tugotan silang makaparada gikan sa alas 12:00 sa udto hangtod sa alas 3:00 sa hapon.

Ang maong pagsikop nahitabo pasado alas 12:00 sa udto ug gipatawag sa hepe si Bañares kabahin niini.

Si Perigo midungag nga abli ang ilang buhatan sa mga gustong moduso og reklamo tungod kay dili sila makapahigayon sa pormal nga imbestigasyon kung wala silay basehan ug kinahanglan usab nga patas sila.