Gwen 'lipay pagtagad ni Tining

Wa ikaasoy sa mga pulong ni Gobernador Gwendolyn  Garcia ang iyang kalipay dihang gidawat siyang mahinangpon ni Mayor Celestino “Junie” Martinez sa Bogo City atol sa pagsubo sa Polambato Port, sa maong dakbayan niadtong Lunes sa buntag.

Human sa mainitong binag-iray sa ilang duha ka aping paghimamatay social, nahatiurok ang gobernador ug wa dayon makatingog dihang gipasupotan dayon og  pangutana sa Banat News unsa siya ka-excited sa iyang pagduaw sa Bogo.

Matud pa sa gobernador nga dili niya ikaasoy sa mga pulong ang hilabihan niyang kalipay kay ang kauswagan nga naangkon karon sa Bogo kauswagan usab kini sa tibook lalawigan.

Sa bahin ni  Martinez kinsa bag-o pang nakig-uli sa maayong kabubut-on kang Garcia human siya maparot sa naulahi sa piniliay niadtong 2004,   ang hingpit nga pagkahuman sa puwerto sa Polambato, labing makapalig-on sa maayong relasyon niya sa Kapitolyo.

Sa bahin ni kanhi Kongresista Clavel Martinez , asawa ni Mayor Junie  igo lang kining mipahiyom dihang gisukit kun wa na ba siyay kasuko sa taga Kapitolyo.

Matud pa ni Mayor Martinez nga dako kaayo ang papel sa Bogo sa pagpalambo sa pamatigayon sa Masbate ug Leyte pinaagi sa pantalan sa Polambato.

Matud pa sa kanhi kongresista sa ika-4 nga distrito sa lalawigan nga kun ang Cebu City maoy “trading center” sa Kabisay-an ug Mindanao, ang Bogo City mao usab ang trading center sa amihanang bahin sa lalawigan sa Cebu, ug sa mga lalawigan sa Masbate ug Leyte.

Gigastohan og P75 milyones, ang Polambato port  nga gisugdan sa pagpaayo sukad pa sa panahon ni kanhi Presidente Fidel Ramos, dayon ni kanhi Presidente Joseph Estrada.